Paroles

fua lauta r aufregung
i hob de so unhamlech gean
das a de med deine fufzk kila
en gauzn dog iwa
bis en d nocht
buglgraxndrong kent
und ned miad wuarat dabei!
a jez moe waun a de en da frua
aus dein haus aussakurna sich
und du schausd ned uma zu mia
woxn ma fua lauta r aufregung
diaregt fagismeinicht aus de finga...
a jez moe waun a de drinad
en ana dranwei oda r en autobuss drif
schdöö r a ma fua
das ii
foes e da schaffna was
ma fua lauta aufregung
dein fuannauman en de haund zwikad
med n makiazangal...
a jez moe waun e zufölech en kino
nem dia r en bloz griag
bumpad ma fua lauta r aufregung
es heazz hintan hemt aso naresch
das se es buplikum beschwead
und me glei en da liachtbause
noch da wochnschau
fon bileteea r ausseschmeisen lost...

wos sol e do mochn?

i hob de eem aso unhamlech gean
das a de en gaunzn dog iwa
bis eine en d finztare nocht
one rniad z wean buglgraxndrong kentad!

owa fua lauta r aufregung damoch es nii
das e amoe dazua kumad
dia des z song...

(H.C. Artmann)